Rryma elektrike prek fëmijën: Ç'duhet të bëni menjëherë dhe si ta parandaloni

Nëse fëmija juaj merr goditje elektrike, kërkoni menjëherë ndihmë mjekësore, sepse mund të ketë dëmtime të brendshme që nuk duken. Rastet më të zakonshme ndodhin kur foshnjat apo fëmijët e vegjël përtypin kabllo elektrike ose fusin sende metalike në priza të pambrojtura.

Çfarë ndodh gjatë një goditjeje elektrike?

Goditja ndodh kur fëmija vjen në kontakt të drejtpërdrejtë me energjinë elektrike, p.sh. duke kafshuar një kabllo ose futur një objekt metalik në prizë dhe rryma kalon përmes trupit të tij.

Dëmtimet e mundshme

Goditjet elektrike mund të shkaktojnë:

-Arrest kardiak, nëse rryma ndikon në zemër

-Dëmtime të organeve të brendshme, muskujve, kockave dhe nervave

-Djegie të brendshme dhe të jashtme

-Lëndime nga rrëzimi pas kontaktit me rrymën

-Simptomat më të lehta përfshijnë: mpirje, dhimbje, kontraktime muskulore, dobësi, dhimbje koke ose kriza.

Kujdes: Edhe nëse djegiet duken të vogla, mund të ketë dëme serioze të brendshme. Vetëm një mjek mund të vlerësojë rrezikun.

Çfarë të bëni menjëherë

-Mos e prekni fëmijën nëse është ende në kontakt me burimin e energjisë.

-Fikni rrymën, hiqni spinën ose çaktivizoni ndërprerësin qendror.

-Nëse s’mund ta fikni, përdorni një objekt jo metalik dhe të thatë (p.sh. dru ose plastikë) për të larguar telin.

-Mos iu afroni ujit nëse aty ka rrymë elektrike.

-Nëse fëmija nuk merr frymë ose nuk ka puls, nisni menjëherë frymëmarrjen gojë më gojë dhe thërrisni urgjencën.

Në raste djegiesh, shkoni në urgjencë pa i prekur plagët ose hequr rrobat e ngjitura në lëkurë. Djegiet në gojë mund të duken të lehta, por të thellohen më vonë; njoftoni menjëherë mjekun nëse ndodh gjakderdhje.

Edhe nëse fëmija nuk ka simptoma, duhet të kontrollohet nga një mjek sa më shpejt.

Shkaqet më të zakonshme

-Kafshimi ose përtypja e kabllove elektrike

-Futja e objekteve metalike në priza

-Lojërat me drita dekorative ose kabllo

-Kontakt me rrymën në ujë (p.sh. tharëse flokësh që bie në vaskë)

Si ta parandaloni

-Mbuloni prizat me kapakë mbrojtës

-Hidhni kabllot e vjetra ose të dëmtuara

-Mbani pajisjet elektrike larg fëmijëve

-Shkëputni pajisjet nga rryma kur nuk i përdorni

-Mbikëqyrni fëmijët pranë burimeve elektrike

-Kontrolloni lodrat elektronike, hidhni ato që nxehen ose nxjerrin shkëndija

Ky artikull bazohet në udhëzimet mjekësore të Dr. Jennifer Shu, pediatre.